முதல் பகுதியின் தொடர்ச்சி....https://www.kundaliniyoga.edu.in/blog/Kudumbathil-Pengalin-Nilai-Uyara-Vendum 

வரதட்சணை என்ற கொடுமையினாலும், குடும்பங்களில் ஒருவரையொருவர் புரிந்து கொள்ளாமல் ஏற்படுகின்ற விவாகரத்துகளாலும், கணவன் மனைவிகளாக வாழ்வோரும், அவர்கள் பெற்றெடுத்த குழந்தைகளும், தம்பதிகளின் பெற்றோர்களும் அடைகின்ற துன்பங்களை விளக்கிச் சொல்ல முடியாது.

பெண்களின் மதிப்பைப் பெண்களும் உணர வேண்டும் 

எத்தகைய சட்டங்கள் போட்டாலும் அதன் மூலம் கணவன் - மனைவி உறவிலே நல்லதோர் இனிமையை வளர்த்துவிட முடியாது. ஆண்களும், பெண்களும் ஒருவர் மதிப்பை இன்னொருவர் உணர்ந்து, அதற்கு ஏற்றவாறு ஒத்தும் உதவியும் வாழ வேண்டும். இந்த நிலைமை சமுதாயத்தில் பண்பாடாக வளர்வதற்குப் பெண்ணின் பெருமையையும் இயற்கையாக அவர்கிடம் அமைந்துள்ள மதிப்புகளையும் ஆண்களும், பெண்களும் உணர வேண்டும்.

பெண்ணினத்தினுடைய பெருமையை உணர்வதற்குச் சில உண்மைகளையும், இயற்கை நியதிகளையும் நன்றாக உணர வேண்டும். எந்தச் சமுதாயமானாலும் ஆண்கள் பாதி, பெண்கள் பாதி என்று பொதுவாகக் கணக்குப் போடுகிறோம். அந்தப் பாதி ஜனத் தொகையான ஆண்கள் அனைவருமே பெண்களால் பெற்றெடுக்கப்பட்டவர்கள் தான்.

ஆண்களுக்கும், பொதுவாக மனித இனத்திற்கும் வாழ்க்கைக்கு வேண்டிய பொருட்கள், வளங்கள் அனைத்துமே பெண்கள் மூலமாகக் கிடைப்பதையும், அதன் மூலம் சமுதாயமே தொடர்ந்து நலம் பெற்று வாழ்வதையும் விளக்கிக் கூற வேண்டியது இல்லை.

பெண்ணினத்தின் பெருமையை உணர்ந்து, மனித குலத்தின் பண்பாட்டை உயர்த்த வேண்டுமென நினைக்கின்ற சிந்தனையாளர்கள் எல்லாம் ஆட்சி முறையைக் கூட சீர்திருத்த வழி காண வேண்டும்.