பசி ஏன் ஏற்படுகிறது? 

உடலியக்கத்தினால் தேவையற்ற அணுக்கள் செல்களில் இருந்து வெளியேறி, எப்போதும் உடலைவிட்டு உதிர்ந்து கொண்டே இருக்கின்றன. அதனால் உண்டாகும் காலியான இடத்தை நிரப்புவதற்கு ஓர் இழுவை சக்தி உற்பத்தியாகிறது. உடலில் ஏற்படக்கூடிய இழுவை சக்தி குடலில் வந்து தாக்கும். காரணம் என்னவென்றால் அங்கேயிருந்துதான் இதுவரைக்கும் ஆற்றல் எடுத்து பரவி வந்தது. அதனால் எல்லா இழுவை சக்தியும் வயிற்றில் வந்து சேர்கிறது, அந்த உணர்வே பசி என்பதாகும். பசி என்பது குறிப்பிட்ட காலத்தில் நிறைவு செய்ய வேண்டிய ஒன்று. உணவுதான் காலியான இடத்தை நிரப்பி, எப்போதும் மனிதனை வளர்ச்சியில் வைத்துக் கொண்டிருக்கிறது என்று வேதாத்திரி மகரிஷி குறிப்பிடுகிறார்.

ஏழையின் பட்டினி : 

ஒரு செல்வந்தர் சாப்பிட்டு விட்டு மாடியில் படுத்து உறங்கிக் கொண்டு இருக்கலாம், உறக்கமில்லாது புரண்டு கொண்டும் இருக்கலாம். அதே மாடியின் கீழ் பிளாட்பாரத்தில் பசியோடு ஓர் ஏழை வருந்திக் கொண்டிருக்கலாம். இவனுக்கும், அவருக்கும் என்ன தொடர்பு என்று மேலோட்டமாகப் பார்த்தால் தெரியாது. இவனுடைய பசியின் வேகத்தில், 'அவர் நன்றாகச் சாப்பிட்டு விட்டுத் தூங்குகிறார், நான் பசியோடு இருக்கிறேனே' என்று எண்ணுவான். பசியோடு இருக்கக்கூடிய இவனுடைய எண்ணம், வருத்தம் எல்லாம் எங்கே நாடி வரும் என்றால், உண்டு களித்து இருக்கக் கூடியவர்களைத்தான் நாடும் என்கிறார் வேதாத்திரி மகரிஷி.

பசிக்கு முறைப்படி காலத்தோடு உணவு கொள்ளவில்லையென்றால் எந்தப் பணியைச் செய்ய முடியும்? காலத்தோடும் முறையோடும் தேவைக்கேற்ப கிட்டாதபோது மனிதனின் அறிவு, உடல் ஆற்றல்கள் திசைமாற்றம் பெறுகின்றன; போட்டியுணர்வும் பாதுகாப்புப் பொறுப்பும் மிகுதியா கின்றன. அச்சம், பகை, பிணக்கு, போர் இவையாக உருப்பெறுகின்றன என்று யோகிராஜ் வேதாத்திரி மகரிஷி எடுத்துக் காட்டுகிறார்.